經歷多番波折嘅東京奧運會，終於喺今日正式開幕！為迎接同慶祝呢個大日子，Google聯同日本動畫工作室「STUDIO 4°C」推出一款名為《 Doodle Champion Island Games（Doodle冠軍島運動會 ）》嘅日系RPG。遊戲內有7種運動項目挑戰同支線任務，並結合桃太郎、河童、三足烏等日本民間傳說人物以16-bit懷舊風格呈現，所有童年回憶都好似返晒嚟！大家只要打開Google首頁，無論手機定電腦都可以即刻玩到。

玩家將會扮演忍者貓Lucky，按喜好加入藍、紅、綠或黃隊，每一種顏色都分別代表住唔同動物，玩家所揀嘅隊伍將會影響住該陣容全球排名分數，而我就揀黃隊嘅，歡迎大家一齊加入刷分數。

當揀好隊之後，玩家就可以挑戰冠軍島上兵乓波、射箭、滑板、韻律泳、欖球、馬拉松、攀山等七項運動。除此之外，島上亦怖滿住各種有趣NPC等各位去探索，同佢哋傾計有機會觸發支線任務。

遊戲內每項運動都考驗住玩家各種能力，例如韻律泳考節奏感、馬拉松考眼力、兵乓波就考反應等等。而且呢種16-bit嘅遊戲風格，真係不禁令人聯想起90年代嘅經典日本遊戲。