我知大家一見到條題就會話，「夏天著白色囉使你講咩！」啱！但你係咪諗住成個夏天都係著白色衫？喺白之外，究竟著咩色衫先係最涼爽……應該係最「唔熱」？日本就有研究員做咗個實測，測試咗九種顏色衫於太陽直射下嘅表面溫度。

日本國立環境研究所嘅高級研究員一ノ瀬俊明早前做咗個實驗，搵黎9個假人，穿上黑白紅藍綠灰紫黃青九種顏色嘅Polo恤，再於30度嘅室外曬咗5分鐘太陽，然後用感溫攝影機紀錄每件衫嘅表面溫度，結果就「毫無驚喜地」發現白色衫真係最抗熱，曬咗5分鐘依然保持大約30度嘅表面溫度，以及黑色衫真係最吸熱，曬咗五分鐘表面溫度就高達50度。

撤除呢兩個「阿媽係女人」嘅結果，更有趣嘅就係其他顏色嘅表現。其中黃色衫嘅抗熱力僅次於白色衫，曬五分鐘後只係升咗一兩度，然後就係灰色及紅色，但都已經升到40度嘅範圍。

特別要留意嘅係，綠色嘅吸熱能力非常高，尤其係深綠色嘅吸熱能力係「媲美」黑色，最高達到50度以上，與白色相距20度。一ノ瀬俊明指，太陽光除咗有可見光 (即係彩虹七色)，其實仲有大量嘅紅外光，而綠色就非常吸紅外光——亦係植物點解會係綠色嘅原因——所以著綠色衫就會非常熱。

資料來源：News.livedoor.com