去餐廳食嘢除左品嚐其色香味之外，環境都好重要，而以下落黎介紹嘅餐廳就好食之餘，仲好有藝術及玩味感覺，值得一試。

坐落於皇后大道西 118 號嘅 Artzbrew 近日正式開幕，餐廳穿梭於舊與新的交界，同時結合畫廊及咖啡室嘅概念，兩者一體致力以餐飲方式，拉近香港人藝術及生活嘅距離。

Artzbrew佔地接近2000呎，分上下兩層，底層為咖啡室，設計簡約，而當中亦加入「博物館藏品級」Roly Poly 設計師座椅，以及牆身掛上多幅藝術畫作，其中包括深受港人鍾意嘅Keigo幽默畫作，亦有大師級Andy Warhol嘅限量親筆簽名畫，令你可以一路歎咖啡，一路住舒舒服服坐住藏品級座椅欣賞價值不菲嘅畫作。

而底層咖啡室由香港咖啡競賽聯盟及具16年歷史嘅咖啡烘焙品牌 Colour Brown 創辦人 Edwin Lee 主領，可想而知質素有幾高，同時佢地主打無肉輕食，主力提供包括自家烘焙酸種麵包、西餅、蔬菜沙律、主食、果昔、甜品等食物。

而同一般咖啡室唔同嘅係，Artzbrew上層為藝術品展覽室，當中會定期舉辦不同藝術家展覽，好似本地著名設計師William Chan設計嘅藍精靈模型、Keigo模型、村上隆模型等等，充滿藝術氣息嘅同時不失玩味，令你觀看嘅時候唔會感到壓力。