由千葉周作創立嘅日本劍術門派「北辰一刀流」創立於江戶時代，曾經出過坂本龍馬等名人門生，與「神道無念流」和「鏡心明智流」並稱「幕末江戶三大道場」，門派亦一直傳承至今。其中「千葉道場」近年就出咗個不一樣嘅掌門，事關佢係一個德國人黎。

圖片：北辰一刀流兵法 / Hokushin Itto-Ryu Hyoho

千葉道場由「北辰一刀流」開山祖師千葉周作嘅弟弟千葉定吉創立，坂本龍馬就係千葉道場嘅弟子。而經過幾代傳承後，2016年接任嘅第七代掌門「大塚龍之介平政智」，其實係一個本名Lösch Markus、現年只有29歲嘅德國人。據Lösch接受日本電視台訪問指，佢喺11歲時睇到由James Clavell作者寫嘅小說《Shogun》而對日本幕府武士產生興趣，喺德國學咗幾年弓道及居合道之後，18歲時就決定隻身前往日本學習最正宗嘅日本劍術，並拜入千葉道場門下。

圖片：北辰一刀流兵法 / Hokushin Itto-Ryu Hyoho

往後佢每日練習7-10小時，而且為咗拎到「師範代」稱號之努力學習日文，最後用咗4年時間獲得「免許皆傳」，亦即學哂門派內所有技術嘅最高頭銜，並獲當時嘅掌門大塚洋一郎賞識，指定佢成為下一任掌門，並為其改名「大塚龍之介平政智」，於2016年正式上任。

近年大塚龍之介平政智已經回到德國慕尼黑，千葉道場嘅本部亦隨之搬到德國，目前有超過200名門生，絕大多數都唔係日本人。佢話道場始創人千葉定吉當年就係本住「任何人都可以學劍術」而設立道場，佢亦秉承呢個理念，希望將北辰一刀發揚光大。

資料來源：北辰一刀流兵法 / Hokushin Itto-Ryu Hyoho