數下手指，《GTA 5》已問世將近8年，雖然線上版一直有更新加入新內容，但全球上百萬名玩家最想見到嘅當然係《GTA 6》嘅出現。最近德國電視遊戲節目「Schlag den Star」就發生咗件「蝦碌」事件，直播期間有位觀眾突然衝到台上質問主持人幾時先有《GTA 6》，點知主持人就話「我都唔知啊，我連《GTA 5》都未玩完喎...」引起全場鼓掌。

據外媒ScreenRant報導，當時節目由Elton Dushat及Evelyn Burdeckiy主持，兩人唔係啲咩遊戲界人物或關發人員，只係當地知名綜藝節目主持，如果硬係要講同遊戲有關嘅話，Elton Dushat就參與過《Halo 3（最後一戰3）》德語配音。由於今次亂入事件太過唐突，有網友就懷疑只係節目組安排嘅「橋段」，不過無論點都好，相信呢位叫Taser嘅狂熱GTA迷，確實講出咗唔少玩家嘅心聲，希望Rockstar Games聽到玩家嘅訴求，加緊腳步開發《GTA 6》。

有傳《GTA 6》將會加入女性主角。

至於《GTA 6》究竟幾時會出？據目前最新傳聞，最快都要等到2024-2025年先正式發售，或者大家期待一下近排盛傳嘅「GTA三部曲重製版」仲好。