由騰訊互動娛樂及Riot Games聯合成立嘅騰競體育，為響應國家最新遊戲禁令，喺尋日宣布會對旗下舉辦嘅電競賽事作出年齡審查及賽規調整。消息一出，唔少微博網民都對中國電競前景非常擔憂，一嚟好多戰隊青訓選手都未夠18歲，二嚟電競係食青春飯嘅行業，如果班未成年選手冇得訓練（即係打機），又點樣喺日後創出佳績呢？

日前中國官方進一步收緊未成年人打機時間，規定網遊企業只可以喺星期五、六、日及法定假期，每晚8點至9點向未成年人提供1小時服務，平日一律唔畀玩。雖則政策出台後立即引起中國網上輿論一片譁然，但各大遊戲企業好快就響應國家政策，相繼「跟機」。

翻查資料，過往嘅英雄聯盟職業聯賽（LPL）以及英雄聯盟發展聯賽（LDL），都只係規定選手夠17歲及15歲就可以出賽，如今主辦方騰競體育宣布禁止未成年選手出賽，除咗各大戰隊要搵成年選手頂替之外，對整個行業都會造成唔少影響。首當其衝嘅固然係各大戰隊嘅青訓選手，一個星期只玩得3個鐘仲可以訓練出啲咩呢？唔通等到成年後再追電競夢？