相信大家都知日本對垃圾分類非常嚴格，除咗分可回收/不可回收，仲有分可燃/不可燃，就算同樣係可回收嘅玻璃樽、鋁罐、塑料都要洗乾淨分開處理，稱佢做「全世界最嚴」亦不為過。最近有環保團體為咗令市民更有分類意識，特別設計出「巨人」垃圾桶，鼓勵（督促？）大家做好垃圾分類。

據日媒報導，呢個垃圾桶由環保團體Change for the Blue及可口可樂公司合作而成，現時設置於《進擊的巨人》作者諫山創故鄉大分縣，大分JR車站自動售賣機旁邊，高1米、寬50cm，而個血盆大口就係垃圾投入處。希望透過巨人嘅凝視，令更多市民做好垃圾分類，關注資源回收等環保議題。

（圖片截自：NHK）

其實原址本身已經有一個瓶罐資源回收桶，但唔少人仍然會將一般垃圾掉入回收桶，對工作人員造成不便，所以先放多個巨人垃圾桶叮囑市民。其中一位20幾歲嘅女士就表示見到巨人垃圾桶覺得好震撼，認為有「巨人」望住，大家都會做好垃圾分類。只可惜呢個垃圾桶只會放到11月，各位身處香港嘅朋友應該冇機會見到。