即將卸任嘅「007」演員Daniel Craig，除咗喺戲內飾演風流倜儻、舉止優雅嘅James Bond，戲外亦係一位事業有成嘅男士，係當今片酬最高荷里活巨星，近日仲獲封為英國皇家海軍榮譽中校。值得一提嘅係，原著小說嘅James Bond加入軍情六處（MI6）之前，就擔任過英國皇家海軍後備隊中校，所以Daniel Craig可以話係「名符其實」嘅James Bond。

英國皇家海軍表示，非常感謝Daniel Craig多年嚟以James Bond身份喺全球執行任務，維護英國安全，行為就同真正嘅海軍一樣，所以非常歡迎呢位榮譽中校加入。另外，榮譽中校同時代表住榮譽大使，向大眾宣傳皇家海軍資訊，成為官方與民眾之間嘅橋樑，簡單嚟講即係形象大使。

根據皇家海軍透露，今次英國國防部都有份參與《007：No Time to Die（007：生死有時）》拍攝工作，借出位於英格蘭南部牛津郡（Oxfordshire）嘅布萊茲諾頓皇家空軍基地（RAF Brize Norton），另外海軍驅逐艦HMS Dragon以及陸軍嘅皇家近衛騎兵（Household Cavalry）都有份客串，電影將於9月30日正式上映，有興趣嘅朋友請多加留意。

資料來源：007.com