Netflix劇集《魷魚遊戲（Squid Game）》席捲全球，開播唔夠一個月就攻佔多國排行榜首位，除咗帶動多位主演Instagram追蹤人數出現爆炸性增長，就連遊戲創作平台《Roblox》都因而爆紅。事關最近有多名開發者喺《Roblox》製作小遊戲，還原劇中6個緊張刺激關卡，吸引大量影迷/機迷下載。

《Roblox》係一個多人遊戲創作平台，畫風類似《Minecraft》，支援Android、iOS、PC、Xbox One多個平台，用家可以喺入面製作小遊戲同其他人一齊玩，隨住韓劇《魷魚遊戲》人氣大熱，唔少開發者就以劇中6個關卡製作小遊戲，等各位可以親自體驗「魷魚遊戲」。

《魷魚遊戲》由韓國名導黃東赫執導及編劇，講述456名參賽者獲邀參加一場相互廝殺嘅生存遊戲，挑戰由韓國民間傳統遊戲改造而成嘅6大關卡。為咗成為最後生還者贏得456億韓元巨額獎金，每個人都各懷鬼胎、互相利用，向觀眾展示「人性」嘅一面。至於幾個關卡分別係咩？我就唔劇透啦，有興趣嘅朋友自己睇啦！