雖然今代iPhone被唔少網友批評了無新意，但開賣當日仍然吸引大量果迷排隊搶購，其中Pro機型更係有價有市，如果大家都有意入手，最好就幫襯官方店或信譽良好嘅電話鋪。事關市面已出現「山寨」iPhone 13系列包裝封條，同原版幾乎一模一樣。

原裝紙質封條。（圖片截自：twitter@duanrui1205）

Apple為響應環保，今代iPhone依舊冇送叉電器，亦將過往嘅膠膜包裝改成撕拉式紙質封條，用家只需按箭咀方向輕輕撕開即可打開包裝盒。當時就有人擔心新包裝會唔會被「別有用心」嘅無良商家偷龍轉鳳，然而要發生嘅始終會發生。

（圖片截自：微博）

近日網上流傳一段短片，顯示深圳華強北已成功仿製封條，重新包裝iPhone 13就好似黐Mon貼咁簡單，而且成本極低，每張封條只需4蚊人民幣。就算無良商人用二手機、壞機、假機偷龍轉鳳，買家都可能完全唔知情，所以大家唔想「中伏」嘅話，最好幫襯Apple官方店或信譽良好嘅電話鋪。