拍電影除咗要有劇本，最重要就係有金主投資，站喺投資者角當然會考慮套戲能否賣座、回唔回到本先肯出錢，所以另類電影題材往往冇辦法喺大銀幕上映。最近本地製作團隊「香城映畫」就希望打破傳統，以網上眾籌方式籌集資金，並搵嚟影帝黃秋生做主角開拍《堅尼地道殺人事件》。雖然目前仲有一段距離先成事，但日前官方就率先推出由黃秋生飾演嘅教車師傅1：6可動人偶。

電影劇情講述黃秋生表面係一個教車師傅，實際上係一個地下犯罪集團首腦，不斷向年輕人灌輸仇富思想，教唆佢哋暗殺有錢人以及幫組織從事犯罪活動，令原本對社會絕對嘅後生仔重拾人生目標，忠誠幫組織辦事。

官方早前亦公開首條宣傳短片，短短13分28秒就可以見到套戲Cult味十足，當中亦不乏諷刺時弊嘅對白「你成功打完劫間金鋪...七除八扣之後每人分得300幾萬，連一間住得有尊嚴啲嘅樓都買唔到啊！」、「香港呢個地方，炒樓仲好過打劫」。想入手黃秋生人偶嘅朋友，可以到「香城映畫」Facebook專頁了解更多。