任何一個有認真玩過《Monster Hunter》系列嘅玩家，都一定試過花費無數時間去刷素材砌裝，當中出現率只有1%嘅寶玉更加係唔少玩家嘅惡夢，「血統」唔夠好真係刷幾十次都冇一粒。但你又有冇諗過刷唔到唔係你運滯，而係Capcom偷偷地操控緊個跌落率？

日本Youtuber「茶々茶(chachacha)」日前就為大家介紹咗一個屬於Capcom，名為「物欲Sensor Program」嘅專利。呢個由2019年9月26日申請，今年4月1日正式公開嘅專利中有104條細項，但前103條整合黎講其實就係一句：Capcom能夠透過分析你目前擁有嘅道具種類、道具件數、擁有嘅裝備 (及其升級所需)、進行咩任務、進行過幾多次、以至你放入願望清單嘅裝備等等，去分析出你究竟想要咩素材，然後就會調整跌落率。例如專利文件中話假設某大劍素材跌落率只有3%，但如果你觸動到「物慾Sensor Program」，佢就會額外追加多1%畀你。雖然4%都係唔高架啦，但似乎都幾佛心呀……？

圖片：https://mhw.fuguai-online.com/

所謂惡魔就在細節中，雖然專利文件中頭103條都係以「追加跌落率」為例子，但最後一條就寫明，視乎情況個跌落率係可以減！仲非常冠冕堂皇咁話減咗就可以增加玩家對遊戲嘅熟悉度、增加稀有物品嘅稀有性、滿足玩家Show Off嘅欲望。

但又值得一提嘅係，目前Capcom係冇講過是否已經將「物欲Sensor Program」放入任何遊戲之中，(《MHW Iceborne》發行於專利申請之前，而《MHR》就發行於專利公開之前)，就算有你亦唔知佢個實質機制係咩 (究竟係加跌落率定減？加幾多減幾多？咩情況下會加、咩情況下又會減？) 。所以目前唯有能夠確定嘅係Capcom擁有操控道具物品跌落率嘅技術，至於佢有冇拎黎用啦喎，就睇你對Capcom嘅品德有幾多信心啦。

資料來源：https://mhw.fuguai-online.com/