一直有唔少Switch玩家反映，Joy-Con粒蘑菇制用耐咗就會無啦啦「飄移」，令角色喺冇操縱嘅情況下自動行走，造成極大困擾。正當大家期待新出嘅OLDE版Switch可以解決問題嗰陣，任天堂高層就坦言問題無法根治，不過會一直提升手制耐用度，全新嘅OLED版Switch將配備目前最好嘅Joy-Con。

隨住OLED版Switch正式發售，最近任天堂喺官網貼出一篇開發人員Q&A文章，其中就提到Joy-Con飄移問題。任天堂技術開發部門總經理塩田興（Ko Shiota）及副總經理Tory Yamashita表示，公司一直改良緊Joy-Con，就好似2019年Switch Lite蘑菇制設計就同2017年嘅原版Switch唔同，但由於零件會因使用而耗損，飄移問題係無可避免，情況就好似車呔接觸地面會磨損一樣，有物理接觸就會有耗損。對此，佢哋就話公司已經致力搵緊方法提升耐用度，同時保留現有嘅舒適度及流暢度，而最新嘅OLED版Switch亦配備咗經改良、耐用更高嘅Joy-Con。

順帶一提，OLED版Switch今日正式發售，建議售價為HK$2,680。至於所配備嘅Joy-Con係咪好似任天堂所講「已改良」，就要等時間去證明啦。