據美國軍事新聞網站《Task & Purpose》報導，今年8月美國陸軍第82空降師奉命前往阿富汗喀布爾機場支援撤離行動，由於人潮洶湧加上距離機場幾公里外就有塔利班，防衛任務困難重重。為解決火力不足問題，一名美軍成功用兩罐煙草向阿富汗政府軍換嚟一部裝有ZPU-2防空機槍嘅Toyota Land Cruiser農夫車，震懾塔利班武裝分子守住機場...

今年8月16日，美軍82空降師504空降步兵團第1營於早上7時抵達喀布爾，負責確保機場安全及維持市民秩序。由於第一營屬於先頭部隊之一，所以汽車同埋重型武器都未運得切過去，然而塔利班武裝就喺機場外虎視眈眈，安全情況令人堪憂。幸好現年25歲，出生於伊拉克嘅一等兵Alsajjad Al Lami，發現即將離開嘅阿富汗政府軍擁有一部Toyota Land Cruiser農夫車，而且車上更配備佢非常熟悉嘅俄製14.5mm口徑ZPU-2防空機槍，於是靈機一觸，嘗試用兩罐沾煙向政府軍「以物易物」，結果非常順利換得車匙。

伊拉克裔一等兵Alsajjad Al Lami。（圖片截自：Task & Purpose via U.S. Army）

Al Lami憑住曾經喺伊拉克服役嘅經驗，好快就教識同袍操作汽車、更換槍管及子彈，最終成功震懾機場外蠢蠢欲動嘅塔利班武裝分子。隨住任務結束，呢部Toyota Land Cruiser亦功成身退，目前已運回美國第82空降師博物館展出。

農夫車已運到美國當作展品。