日前國際名導王家衛與蘇富比（Sotheby's）合作舉行拍賣會，賣出30件電影精品，其中包括張國榮喺《春光乍洩》著過嘅黃色皮褸、梁朝偉喺《花樣年華》用過嘅打火機同墨水筆，但最矚目嘅莫過於以NFT形式出售嘅《花樣年華》絕密片段，最終成功以428.4萬港幣成交。

今次售出嘅絕密片段NFT名為《花樣年華 – 一剎那》，全長1分32秒，於1999年2月13日首日開鏡錄製而成。從預覽片可以見到梁朝偉所飾演嘅角色原本並唔係叫周慕雲，而係叫做阿雄，留住「二撇雞」鬍鬚，戴上黑超，畀人感覺十分花弗，同文質彬彬嘅周慕雲完全唔一樣，唯獨兩個角色都一樣好鍾意食煙。而張曼玉雖然都係身穿旗袍，但就冇咗蘇麗珍個份矜持內斂，反而有啲花枝招展，並道出一句「我依家知道咩叫愛情㗎啦，今晚嚟我度。」整體有種「姣婆遇著脂粉客」嘅感覺，可想而知王家衛應該改過好多次版本，先至有今日今日大家所睇到嘅《花樣年華》。

完整版預覽片，可以到蘇富比網站觀看（請按呢度）。

除咗《花樣年華 – 一剎那》之外，王大導又從「澤東庫藏」挑選出30件珍藏電影道具拍賣，其中競爭較為激烈嘅何寶榮黃色皮褸就以75.6萬港幣成交。

《春光乍洩》黃色皮褸。

順帶一提，王大導同時撰文分享《花樣年華》創作理念：「創作往往來自一念。一個念頭有九十剎那，一剎那有九百生滅。《花樣年華》的一念何來?難說。 可以確定的是，1999年2月13日是我將這一念頭付諸行動的第一天。每部電影拍攝的首日，等同與夢中人的第一次約會；既驚且喜，如履薄冰。開弓沒有回頭箭。 二十年過去了，這支箭還在飛著。」到底講緊啲咩？就交畀各位自行解讀。