當大家生活遇到不如意嘅事，少不免會上網同其他人呻吓，例如買唔到PS5、新iPhone冇誠意、玩遊戲遇到Bug等等。最近外國網站《RAVE Reviews》就透過研究工具SentiStrength分析咗近100萬條同品牌有關嘅正負面Twitter推文，整理出「全球各國最討厭品牌」排行榜，結果SONY以最多負評奪冠，成為10個國家人民最討厭品牌，而香港人最討厭就係Facebook。

撳呢度查看大圖。（圖片截自：RAVE Reviews）

根據名單顯示，全球前幾名令人討厭嘅品牌分別係SONY（10國榜首）、Tesla（7國榜首）、Paypal及Uber（同樣係5國榜首）。

撳呢度查看大圖。（圖片截自：RAVE Reviews）

如果以Big Tech分類嚟睇嘅話，Microsoft以22國負評榜首成績奪冠，緊隨其後嘅就係Google同Facebook（兩間加埋合共24國），其中Facebook亦係香港人最討厭品牌，負評比例高達85%。

撳呢度查看大圖。（圖片截自：RAVE Reviews）

至於用遊戲品牌分類嘅話，相信各位機迷對結果都唔會意外，以遊戲多Bug聞名嘅Ubisoft憑住23國負評榜首榮獲全球最討厭遊戲品牌。但有趣嘅係，比起Ubisoft，港人更加討厭CAPCOM，唔通大家都唔鍾意佢瘋狂炒冷飯，重製又重製生化危機系列？

值得注意嘅係，以上統計係透過調查Twitter正負面評論所得，對於一啲唔係以Twitter為主要社交媒體嘅國家及地區嚟講（e.g.台灣、香港），結果可能會有一定偏差。而《RAVE Reviews》亦作出總結，認為某啲品牌雖然獲得大量負評，但有人討厭都好過完全冇人討論嘅...完整報告可以到網站了解更多。