Apple喺今日凌晨時分舉行第二場秋季發布會，推出全新設計MacBook Pro，除咗MegSafe充電、HDMI接口、SD卡槽等深受歡迎嘅功能全數回歸，今次處理器更用上性能強大嘅M1 Pro/M1 Max晶片，分別14及16吋兩個版本選版，為專業用戶提供強勁影片編輯及運算能力...

1.MacBook Pro 2021

從外觀嚟講，今代MacBook Pro捨棄Touch Bar變返做實際按鍵，而MegSafe磁吸式充電、HDMI接口以及SD卡槽亦全數回歸。14及16吋螢幕都用上Mini LED技術，提供1000nits亮度以及1,000,000:1對比度，並支援ProMotion更新頻率自動適應技術（即120Hz刷新率）。另外，螢幕邊框亦比上代更窄（少於4mm），只可惜為加入1080p HD鏡頭所以選用「M字額」設計，不過Apple就話瀏海所佔據嘅空間位於選單列，所以用全螢幕程式或播片嗰陣都唔會好礙眼。

至於硬件性能方面，今次Apple就將自家嘅M1架構推向新高，全新MacBook Pro搭載M1 Pro或更高級M1 Max晶片。官方聲稱兩款晶片無論CPU定係GPU性能都非常強大，閒閒地都快過其他手提電腦幾倍，並擁有非常出色嘅能源效益表現（即高效能得嚟又唔太食電），令續航力變得更長，14吋為17小時，16吋更長達21小時，而且支援快速充電，30分鐘就可以充50%電量。

14吋MacBook Pro售價為HK$15,999起；而16吋版本就有M1 Pro及M1 Max兩個版本，前者為HK$19,799起，後者為HK$27,299起，今日起接受訂購，並於10月26日開始發售。

2.AirPods 3

除咗主角MacBook Pro，Apple亦喺今次發布會推出第三代AirPods，採用半入耳式設計，耳柄變得更短，支援Apple Music嘅Dolby Atmos功能，亦都抗汗及防濺水，就算做運動都可以配戴。

至於續航力方面就長達6小時，連埋充電盒就總共有30小時聆聽時間，而且充電盒亦加入咗MagSafe無線充電功能。即日起於開放訂購，價售為HK$1,499，下禮拜開始出貨。