先前同大家提過，Xbox Series X剛推出嗰陣因為長方柱體外型而被網民笑似雪櫃，並整成各種Memes於網絡廣為流傳。面對網民嘅嘲笑，Microsoft就選擇真係整個Xbox迷你雪櫃出嚟，並喺噚日開放預購，唔夠15分鐘就被人搶清光，有黃牛甚至炒貴近3倍轉賣。你又點估到除咗部遊戲機食炒，依家連部Xbox造型嘅雪櫃都有得炒呢？

據官方介紹，呢款名為「Xbox Mini Fridge」嘅迷你雪櫃外觀上同Xbox Series X主機一樣，大約放到12罐嘢飲，門內設有隔格可以用嚟放零食，正面就有一個USB接口可以為客人嘅裝置充電，售價為US$99.99，10月19日起於歐美多地開放預購。

有網民反映，個雪櫃喺噚日開賣唔夠15分鐘就被搶光光，eBay上更有黃牛炒貴近3倍轉賣，不過官方就話今次預購只係「第一波」，嚟緊將會增加貨量及擴大銷售地區，換言之大家第時都有機會買到。

eBay出現大量黃牛黨高價轉賣。