由於日本眾議院喺今個月14號解散，轉個頭31號就舉行下屆選舉，極為緊湊嘅選戰日程令各黨各派忙於到處拉票，各地相關部門亦都忙到甩轆，其中群馬縣太田市公務員更加要瘋狂刨筆...

據日媒ANN報導，由於日本嘅投票方式，係用鉛筆填上候選人嘅名再放入投票箱，為避免共用鉛筆會傳播疫症，唔少地方政府都決定向每位選民單獨派一鉛筆，等佢哋填完再拎返屋企自用。

太田市訂咗10萬3000支印有「再見疫情」字句嘅特製鉛筆。

後來加訂1萬支三菱出品嘅「抗菌」鉛筆。

其中群馬縣太田市就專程訂咗10萬3000支特製鉛筆，貼心咁印上「再見疫情」字句，奈何廠商趕唔切交貨，所以佢哋又加訂咗1萬支聲稱有「抗菌」功能嘅未刨鉛筆，結果搞到當地公務員要喺返工嘅空閒時間瘋狂刨筆，不過好彩嘅係佢哋有電動刨筆機用，唔使逐支用手扭下扭下咁刨。據報導所指，截至19日佢哋差300支就刨晒，相信當大家睇到呢篇文嗰陣已經任務完成。