為慶祝《GTA 3》問世20周年，Rockstar Games宣布推出《GTA三部曲》重製版，聲稱會以現代技術全面升級遊戲玩法及畫質，同時保留原作經典外觀及氛圍。日前官方就公開首條實機預告，唔知大家鍾唔鍾意呢種有啲「卡通」嘅畫風呢？

從實機預告片可以睇到，重製版畫面更加鮮艷，光影、天氣、反射效果都有明顯升級，而角色及載具模組就變得更加清晰同冇咁「起角」，仍然保留到原作嘅獨特美學風格，不過依家清晰咗反而變得啲卡通。

除咗畫質之外，官方亦表示遊戲操作控制都有所提升，包括改善瞄準及鎖定瞄準、更新武器選單及電台撥盤、更新小地圖及強化導航等等，至於實際有幾大升級，就真係要玩過先知。

《俠盜獵車手：三部曲-最終版》（Grand Theft Auto: The Trilogy – The Definitive Edition）將於11女11日登陸PS5、PS4、Xbox Series X|S、Xbox ONE、PC、Switch多個平台，售價為US$59.99（約HK$466），預計2022年會出iOS及Android版本。

有機迷就專程整咗條原版vs重製版嘅片，唔知大家鍾唔鍾意重製版嘅畫風呢。