出咗名多石油嘅沙特阿拉伯，日前公布一項名為「The Rig」嘅投資項目，計劃將一個位於波斯灣嘅鑽油台改建成主題樂園，佔地超過150,000平方米，提供過山車、笨豬跳、水上滑梯等刺激遊樂設施，吸引世界各地遊客前往。

據了解，主題樂園「The Rig」由沙特阿拉伯公共投資基金（PIF）出資興建，預計會有3間酒店提供800多間客房，11間餐廳，其中一間仲要係「海底餐廳」。另外，當然唔少得一系列刺激嘅遊戲設施，從官方宣傳片可以見到有過山車、滑索、摩天輪以及大量水上活動，遊客可以透過直昇機或郵輪入園。

雖然睇落好似非常吸引，不過計劃尚在構思階段，未知幾時動工。官方表示，希望主題樂園能夠推動沙特阿拉伯旅遊及娛樂產業發展，達至經濟多元化，同時期望2030年之前，每年可以吸引到1億名遊客到當地旅遊。