隨住《男兒當入樽》電影版將於明年秋季上映，最近網絡瘋傳一張電影海報，指劇情將會係大家期待已久嘅「湘北vs山王工業」，但後來發現原來張圖係Fans自製，並非官方消息。可能作者井上雄彦唔想見到大家再次「集體炒車」，喺今日就宣布開設個人Instagram，大家仲唔快啲一齊Follow！

風靡90年代嘅人氣熱血動漫《男兒當入樽》，絕對係一代人集體回憶，當年都唔知「導」咗幾多人去打籃球，成班人喺街場幻想自己係櫻木花道不停上籃（因為鋤唔到樽），所以今年年初官方宣布推出電影版嗰陣，隨即引起網絡一片轟動。

雖然電影大約仲有一年就上映，但截至目前官方都冇透露太多情報，只係出咗一條30秒嘅宣傳片，從片中嘅平頭裝櫻木花道可以推測，電影劇情應該係聚焦喺漫畫後半段，至於究竟係咪大家望穿秋水嘅「湘北vs山王工業」就仍然係未知之數。

View this post on Instagram

A post shared by Art of Takehiko Inoue 井上 雄彦 (@inouetake_)

正當大家苦苦等待之際，日前一個名為「inouetake_」嘅IG帳戶就貼出一張「湘北vs山王工業」電影海報，引嚟大量網友瘋狂Share紛紛表示「終於等到！」，就連我都興奮咗一下。之不過呢，有人好快就發現呢張圖並非官方消息，而係Fans自製，唔知你又有冇興奮咗一下呢？或者見到太多人中伏，一向只喺透過Twitter分享消息嘅井上雄彦，就喺今日宣布開設個人IG，雖然目前只有一張相，但相信日後應該會有更多嘢睇，大家不妨Follow！

View this post on Instagram

A post shared by 井上雄彦　INOUE Takehiko (@inouetake88)