近年於Mirror領頭之下，新人男歌手可以話係如雨後春筍咁不停標出黎，反觀新人女歌手，喺《全民造星4》女團成軍之前，相信就只有環球嘅Jace等少數幾位獨撐大旗。而喺出道兩年後，Jace日前亦宣佈會於今年12月，假九展Star Hall舉行首場售票演唱會。

Jace早於8月時就曾經於九展Music Zone舉行首個個人音樂會，早兩個星期亦與Error、欣宜及岑寧兒於《Chill Club The New Vibes》音樂會上合作，有見兩次音樂會反應熱烈，於是於今年12月11及12日轉戰九展Star Hall，舉行《FWD 富衛保險呈獻 陳凱詠 UNBORDERED 演唱會》。門票分HK$780、$580及$380，11月1日起於KLOOK獨家發售。

Jace出道後形象一直鮮明有性格，今次演唱會以「Unbordered」為題，亦係希望展現個人獨特性，盡情將自己鐘意嘅音樂帶畀Fans。Jace亦指今次「成功爭取」T字型舞台，拉近與觀眾嘅距離。亦會要請多位男嘉賓，「有識跳舞嘅、有識彈結他嘅」，仲話要跳爆個場。