{ SKIP }
文:MenClub 魏文青  
POSTED ON 05 Nov 2021

From Software嘅宮崎英高創出過《Dark Souls》、《Bloodborne》、《隻狼》等以難度著稱,卻又令人欲罷不能嘅遊戲,而其最新作品《Elden Ring》亦預計會於明年2月推出。發行商Bandai Namco昨日就公佈15分鐘嘅實機遊玩影片,進一步揭開遊戲嘅系統,以及遊戲世界「Lands Between」嘅面貌。

PC版畫面極靚,睇黎大家要儲錢砌機啦

今次公開嘅15分鐘實機影片係來自遊戲嘅PC版本,一開始先簡單介紹幾個遊戲機制,包括與《Souls》系列中嘅營火有相同功用嘅「Site of Grace」,亦提到Site of Grace有機會生出一道指引之光,提示玩家去下一個目的地,但玩家亦可以選擇無視佢自行探索整個地圖。另一大特色就係「靈馬 (Spirit Horse)」,基本上係作為交通工具,方便大家穿梭地圖,實機影片中亦見到於廣闊草地上騎喺馬背上與飛龍戰鬥嘅場景。

或者係因為今集嘅遊戲世界非常廣闊,所以《Elden Ring》加入咗世界地圖,玩家可以自行標記重要地點,從實機影片中亦可以一窺「Lands Between」有幾咁大。另外亦提到加入「製作」機制,玩家可以將幾種素材合成其他道具。實機影片中就合成出「睡眠箭」迷暈敵人後,再行埋去作出致命一撃。再加上片段稍後出現嘅潛行,或者會出現「暗殺流」嘅玩法

道具欄由介面以至道具圖都充滿《Dark Souls 3》嘅感覺。

潛行

線上模式可以與其他玩家聯機遊玩。順帶一提今集啲出召特效非常華麗

另外實機影片亦提到,玩家今集可以召喚出不同嘅「靈體 (Spirits)」黎協助自己作戰,靈體亦有唔同種類、特性,玩家可以收集適合自己嘅黎用。線上模式同樣可以召喚其他玩家一齊探險,實機影片中就示範咗一齊打Boss,值得一提嘅係今集嘅魔法、咒術特效都大幅提升,極為壯觀。

影片中段就展示咗地圖中出現嘅地下迷宮,佢就話地下迷宮中可能有寶物,亦可能有Boss,總之就係值得一探。從實機影片可見,《Elden Ring》中嘅地下迷宮無論外觀設計、陷阱、敵人種類等都充滿《Dark Souls》風格。另外室內地方似乎就冇得騎馬移動。

中段出現嘅謎之NPC
Stormviel Castle
Boss「Godrick the Golden」

到後段就展示咗遊戲中「Stormveil Castle」嘅冒險過程,基本上都係典型嘅「大門入唔到,搵小路兜入去」嘅流程,但值得一提今集加入「跳躍」動作,無論戰鬥、移動、甚至騎緊馬時都可以使用,亦可以翻越某啲地型,相信今集嘅地型難度應該會增加唔少。

實機影片最後就係與半神「Godrick the Golden」嘅戰鬥,整體而言依然充滿《Dark Souls》嘅感覺,但比起以往「擋一下,碌一下,斬一下」嘅「回合制」唔同,今次 (至少係呢隻) Boss嘅攻擊普遍為多段攻擊,而且節奏都頗快,略有幾分《Bloodborne》嘅影子。

繼《Stranger Things》第4季取得破紀錄收視後,兩位主創Matt Duffer及Ross Duffer今日宣布成立全新製作公司「Upside Down Pictures」,並同Netflix合作開拍美劇版《死亡筆記》! 據外媒《Deadline》報導 ...
hobby
【影視】Netflix開拍全新《死亡筆記》真人劇集!由《Stranger Things》主創操刀
07 Jul 2022
PS5嘅由推出至今都一直存在供貨問題,「買唔到PS5」先係一眾機迷嘅「正常狀態」。過往我哋都曾經分析過PS5及PS4嘅同時期出貨數據其實相差不遠,換言之唔係Sony整出黎嘅PS5特別少,係啲PS5整咗出黎之後唔知賣咗去邊。 ...
hobby
【電玩】每部賺兩萬Yen 日本水貨商指PS5全售往中國
06 Jul 2022