以前啲Game唔興漢化，但單憑記住啲片假名個樣就打得爆Pokemon嘅人不在少數。反而今時今日，機迷們就覺得漢化版係理所當然，如果冇仲會憤而投訴。好似美國H Game廠商Studio FOW早前以眾籌方式，出咗隻叫《Subverse》嘅H Game，結果就不停畀中國網民投訴冇簡體中文翻譯，近日Studio FOW發公告解釋原因，更加惹黎大量負評。

圖片：截圖自《Subverse》on Steam

件事就咁嘅，自從《Subverse》於今年三月推出之後，Studio FOW就不停收到中國玩家要求佢哋出簡體中文版——據Studio FOW於公告中講係「幾乎每個平台嘅每個Post都見到」——於是佢哋就喺Steam出咗個公告解釋。公告先話中國玩家對佢哋黎講「非常、非常重要」，但接下來就引用玩家留言，指「中國目前對於暴露嘅皮膚都已經有嚴格規定，更唔好講係裸體內容或者H Game。如果係正體中文就可以投放資源去做。」並表示「正體中文先」亦係佢哋目前嘅策略。

公告又期望中國玩家能夠明白佢哋嘅難處：「既然你個國家都唔畀你玩成人內容，希望你哋接受我哋以唔出事嘅方法去處理」。

圖片：截圖自《Subverse》on Steam

然後Studio FOW又貼出另一位網民留言，叫Studio FOW去「Check下你啲資料，當你知道幾多眾籌同預購係來自中國人嘅時候，你就唔會咁講嘢啦！」點知Studio FOW就回應話：「我真係Check過，根據資料，其實啲華人玩家都唔係來自中國喎，實際上根本就冇玩家係黎自中國——咁都好合理呀，你個國家唔畀你玩架嘛！」、「就我哋所見，唔講英文嘅華人玩家都係來自香港同台灣。」由於中國玩家要用VPN翻牆先玩到隻Game，所以數據顯示「冇中國玩家」又確係合理。

最後Studio FOW重申「希望大家明白，我哋唔可以喺中國宣傳、販售隻Game，自然就無辦法做到本地化嘅簡體中文版」、「希望大家畀啲耐性，等我哋整好個英文版，未來就會滿足大家用中文玩嘅要求。」

結果呢篇公告就對一眾中國玩家嘅心靈造成嚴重打擊，紛紛去Steam到負評《Subverse》，令遊戲評價變成「壓倒性負評」。值得一提嘅係唔少留言都有句「中國是你親爹」，而且大部留言都係人身攻擊。另一邊廂，亦有用正體中文嘅玩家特登去觀摩中國網民嘅留言。