唔知幾時開始，YouTube充斥住各種以「X分鐘看完電影」為題嘅速食短片，一班創作者透過擷取電影片段再加上個人旁白，用短短幾分鐘就「解說」完一套90-120分鐘嘅電影，啱晒啲想聽故仔，又唔得閒睇足成套戲嘅觀眾。之不過呢種介於「二次創作」及「侵犯版權」之間嘅行為向來都充滿爭議，最近日本就出現首宗定罪個案，相關創作者被判處有期徒刑及巨額罰款。

除咗Youtube，中國各大短片平台亦充斥住「x分鐘看完xx電影」短片。

早於今年6月，日本宮城縣警方以涉嫌侵犯版權、違反著作權法為由，拘捕及起訴三名「電影解說短片」創作者。經過幾個月時間審訊，三位被告於日前正式被裁定有罪，被告A被判有期徒刑2年，緩期4年，罰款200萬日元，被告B被判有期徒刑1年6個月，緩期3年，罰款100萬日元，而被告C就被判有期徒刑1年6個月，緩期3年，罰款50萬日元。

幾年前台灣Youtuber「谷阿莫」就因為短片涉嫌侵權而賠上100萬新台幣。

由日本多間電影及動畫公司組成嘅「內容產品海外流通促進機構（CODA）」就表示，呢類解說短片會搞到觀眾唔想畀錢睇電影，估計每年令片商損失近956億日圓。認為今次判決有效打擊「快電影（即解說短片）」風潮進一步蔓延，同時為往後相同個案提供範例。