Marvel Studios年度壓軸之作《Spider-Man: No Way Home（蜘蛛俠：不戰無歸）》唔夠一個月就上映，相信呢幾日各位Marvel迷都Loop緊條最新預告片，睇下搵唔搵到「三代同堂」嘅證據，就算搵唔到都可以望梅止渴一下。最近香港著名玩具品牌Hot Toys就搶先推出「蜘蛛俠 （Integrated Suit）」 1:6比例珍藏人偶普通版及豪華版！

本作高約28.5cm，全身共有30多個可動關節，能夠輕易擺出各種Pose及騰空戰鬥形態。以紅黑配色為主調嘅全戰衣Integrated Suit由高彈性布料縫製而成，並用上滴膠及絲印技術還原服裝上各種細節及紋路，而胸口就有一個英氣十足嘅金色蜘蛛標誌圖案。搭配埋4支金色機械蜘蛛爪配件，就可以重現Peter Parker劇中各種英姿。

至於頭雕方面就分別有戴頭罩同冇戴頭罩兩個版本，精細還原出Tom Holland嘅神韻，而且玩家可以利用附送四對眼晴配件，去替換面罩上嘅眼神還原劇中各個表情造型。

今次總共有普通版同豪華版本，豪華版本除咗有上面所提到嘅內容之外，仲會追加一個特別戰鬥場景地台以及一個半面罩造型嘅Peter Parker頭雕。地台結合各種經典反派元素，例如八爪魚博士機械爪及綠魔炸彈，能夠進一步提升人偶嘅電影臨場感！

《蜘蛛俠：不戰無歸》蜘蛛俠 (Integrated Suit) 1:6比例珍藏人偶(普通版)

零售價：HK$1,780

推出日期：約2023年第1季至第2季 

《蜘蛛俠：不戰無歸》蜘蛛俠 (Integrated Suit) 1:6比例珍藏人偶(豪華版)

零售價：HK$2,680

推出日期：約2023年第1季至第2季

資料來源：Hot Toys