近來唔少電影都會推出NFT作為宣傳，但喺芸芸眾多電影之中，最符合NFT、以至區塊鏈、加密貨幣呢個主題嘅，就一定係《The Matrix》。適逢《The Matrix 4》亦會於今年12月上映，Warner Bros.亦決定與Nifty's 合作推出10萬個《The Matrix》Avatar (人偶)，大家更能如電影一樣，決定食下紅或藍藥丸，改變人偶嘅命運。

不厭其煩講多次，所謂NFT其實就一個處於區塊鏈上嘅藝術品電子認證，有咗呢個認證就代表你真係擁有該物品——當然，亦可以係虛擬物品。而今次《The Matrix》推出嘅就係基於Epic Games MetaHuman Creator生成嘅10萬個Avatar，其髮型、髮色、衣服、配件等都係隨機生成，每一個都係獨一無二，可以想像如果你咁啱刷到個同《The Matrix》人物好似樣嘅Avatar，其身價一定立即標升。

另外10萬個Avatar都係屬於Profile Pic (PFP) NFT，亦即買咗之後可以用黎做社交平台嘅頭像，有咩用？型囉！

一般NFT黎到呢個地步就淨係得返買賣可以做，但呢組《The Matrix》NFT就可以繼續升級，甚至獲得新嘅NFT獎勵。另外12月16日時，NFT擁有者亦可以選擇如電影一樣「服下」紅或藍藥丸，如果依藍藥丸就會「留喺Matrix」，即係保留「一般人服裝」；而選擇食紅藥丸就會「脫離Matrix」，Avatar嘅服裝亦會變成「Matrix」風。

Matrix NFT將於11月30日喺Nifty's上推出，每個售價為50美金，即係約HK$390。值得一提嘅係撰文之時，Nifty's個網係處於死機狀態，如果大家到時有興趣入手《The Matrix》NFT，就可能要早作準備。

資料來源：Nifty's