今年58歲嘅陶大宇曾經紅極一時，老是常出現喺大台劇集及綜藝節目，又被譽為「師奶殺手」，而佢嘅招牌動作「掩面笑」更被製成各種Meme於網上廣為流傳。近年轉戰中國市場四處演出嘅佢，最近就因為一條翻唱《倒轉地球》嘅短片而喺中港兩地再次走紅，事關佢嘅特別演唱技巧加埋個「水撥手」動作台風十足，甚至有香港網友幫佢整咗個FB關注組，要求樂壇可以畀返個交代陶大宇，結果唔夠一日已經有超過700人加入。

近年唔少香港歌手藝人都轉戰到中國市場發展，期望可以谷底翻身或再創事業高峰，曾經拍過《大時代》、《刑事偵緝檔案》、《壹號皇庭》以及N套劇集嘅陶大宇亦唔例外，不過佢就唔係做返演員老本行，而係選擇登台唱歌展示佢不為人知嘅一面。或者因為擁有超過30年演出經驗，佢即使唱歌都加入咗唔少戲劇元素，無論表情同肢體語言都交足晒戲，喺台上左跳右跳又揮晒手，帶畀觀眾一場視聽盛宴！

經過網友們連日轉載，再加上香港YouTuber「HEBEFACE」嘅解說，令愈嚟愈多人被陶大宇中氣十足嘅魔音深深吸引，甚至喺今日開咗一個叫「我老婆鍾意咗陶大宇導致婚姻關係破裂關注組」Facebook群組，整理出陶大宇各種演出片段，並揚言樂壇欠佢一個交代。