據台灣媒體報導，前《英雄聯盟》世界冠軍成員、現知名Youtuber「Toyz」劉偉健，早前因涉嫌販賣大麻煙彈被捕，經過兩個月羈押，Toyz喺噚日獲法院裁定以150萬新台幣（約42萬港幣）保釋。不過，檢察官同日以Toyz涉嫌吸毒，向法院聲請觀察勒戒獲准，目前Toyz至少要喺看守所接受1個半月觀察勒戒，確定已無毒癮先可以（暫時）重獲自由。

圖片：Toyz Facebook專頁

Toyz因涉嫌網上販賣大麻煙彈於9月28日被台灣警方拘捕，並喺佢位於新北市三重區嘅住宅搜出200粒大麻煙彈，由於案情重大，Toyz同月30日被送到台中看守所羈押禁見。基於台灣《刑事訴訟法》規定，偵查中嘅被告唔可以羈押超過2個月，但可以延押1次，於是檢方就喺上星期五申請延押Toyz，不過法官認為已經無羈押嘅必要，所以裁淮Toyz以150萬新台幣保釋並限制其出境。

圖片：Toyz Facebook專頁

之不過呢，由於Toyz被驗出曾經吸食毒品，檢察官就向法院聲請觀察勒戒並獲法官裁准，所以Toyz交完保釋金就被送到看守所所設勒戒所，接受最快1個半月，最長2個月嘅觀察勒戒，屆時勒戒所將會提交評估報告，確定佢已無毒癮先可以離開，否則會繼續強制勒戒6至12個月。至於最後使唔使坐監，坐幾耐就仍然審訊當中。