日本耳機品牌 Aviot一直行高質素低價格的大眾化路線，繼上年TE-BD21j二鐵一圈真無線耳機，今年又有全新TE-D01t 主動降噪真無線耳機，使用混合式降噪物理加上主動式ANC廠方話最多可消除50dB 噪音。我實試就無咁誇但一般環境下一種寧靜消音感可以揮揮手就感受到！今次耳機大大粒合符人體工學帶得舒適用得長久，電量可用18個鐘加特大充電盒有60小時電量基本一星期懶得叉電都無問題，總結最簡體評價係聲音清澈高分析力具超值全四星級全方位優質應用體驗。一千銀的耳機話無敵應係無知，但使用上所有方面聲音、通話、降噪、接收、電量、舒適、價錢都係80分，無任何野值得投訴但所有方面都有更貴更高階耳機比佢好。呢個藍牙 5.2 優化無線降噪耳，係非中國品牌耳機中最高性價比的產品沒有之一。

今次有幸一試日本品牌 Aviot 最新 TE-D01t 主動降噪真無線耳機，新型號加上混合式主動降噪功能，最初見到廠方所述說可消除 50dB 噪音係有嚇一跳之感，甚有期待！但當然繁忙的地鐵中開動降噪都唔可能讓身邊所有人同事聲音消失無聲。本體有一個非常合符人體工學的優良設計，帶上雙耳好舒適雖然耳機幾大粒但好輕盈無負重壓力，將耳機帶上跟說明書要求位置扭一扭，本身已經物理上做到唔錯的隔音效果。開埋ANC 主動降噪功能，位處室內堅感受到個一下忽然寧靜感！功能解構來講TE-D01t 單邊就有3個美國 Knowles MEMS 高級咪高風，除一般收音通話用外，耳機反方向仲有一個降噪專用收音咪，而加上耳機內有一個耳內回饋收音咪，可偵測漏到耳內噪音作進一步加強降噪效果。所以物理加上主動降噪的確降噪機能相當唔錯！但用家不要想像為咩聲都隔哂例如地鐵內無聲，這是不可能也沒有實現！另外提提耳機有環境音功能，需要時可開接收外界聲音，毋須下下除低耳機。

Aviot TE-D01t 話一雙耳機用左6個美國 Knowles 優質咪高峰收音，可提升通話品質，我試機時打左幾次電話同whatapps錄音，結果對方都相當滿意。測試時老婆回覆：「無咩特別你個野，咪同平時講野一樣！」呢點對我來講都好特別，平時我根本無用藍芽耳機！不過當你去尖東海旁風噪比較大的地方，即使你開左防風噪功能，只係你耳機聽落無咁大風聲，絕非通話時你老婆聽唔到風聲，佢依然會大叫「你個度好嘈，收線啦！」介紹返，耳機有防風噪功能可開關應用，對跑步聽歌防風聲有幾正面幫助。可以用手按左邊三秒開關，也可以方便地手機Apps清晰開關！跟機應用專屬手機App 「Sound Me」功能全面，可快速連接並設定及操控耳機所有的功能，雖然全日文但基本上唔難理解，廠方介紹app配合有自由調節 10 段 EQ，玩到無野玩可以一試，另外此機有耳機檢測功能應用程序“AVIOT SOUND ME”會自動記錄上次使用耳機的位置。即使您唔小心放錯左地方或丟了，用家也可以通過智能手機進行搜索。

如果你問Aviot TE-D01t有咩優點，我第一個感覺係以這個價位，佢聲音算非常出色，以我了解主體用左石墨烯及PU複合材料 Φ10mm的大直徑動圈單元，的確發揮到動圈特點寬闊音域，人聲清晰廣闊包圍感良好。低頻我覺得夠但個人唔多聽低音量多的音樂，自我對低音需求唔大絕對收貨。尷尬係我無用手機打機的習慣，無得試遊戲(低延遲)模式好唔好用，但開左睇Netflix配合耳機本身靚聲感覺好像幾好完全無遲延！另一個此機最大優點肯定係強大電力，佢續航力達 18 小時(ANC off)，個人用一日都夠用。個充電盒有60小時備用，電力強勁之餘更支援無線充電！仲有要一讚其專屬手機app 「Sound Me」介面清晰操作快捷容易！最後耳機顏色搶眼手感光澤，美觀都算係優點！再最後但最重要的優點，呢個耳機以其功能同使用體驗而言價錢幾平，1000多少少買到呢個質素，好過買平幾百有「鑊氣」的耳機！

至於有無缺點呢？有的，個耳機盒比較大唔緊要，但耳機第一次使用時真係好難取出，佢有種特別的吸力單手基本上無法取出耳機，有時街上取出使用有不便感覺！後來得出需要雙手按著耳機，身指伸入合符人體工學地向磁力反方向一扭就可扭出耳機(你當用兩隻手指揸住粒Lin！)！可能算係日本設計師的堅持，你要跟佢設計慢慢習慣下取出耳機方法！另此日本牌子所有說明同手機App都只得日文使用同聽落都唔夠親切！最後耳機只對應AAC,SBC，個人認為小小可惜！對比起其缺點，呢隻耳機明顯超值抵用，市面上耳機有分旗艦產品群，呢個Aviot TE-D01t電量無敵價錢實惠，而其他方面在聲音質素、通話能力、降噪、距離接收、舒適性等都輸少少給各自在不同領域中最優勢的大廠旗艦耳機，但所有方面都非常高質素拉得好接近，係近來我試過非最好但最好用的耳機之一！

General Specification

單元：10mm

藍牙版本：藍牙 5.2 (AAC,SBC)

支援音訊格式：A2DP,HFP,HSP,AVRCP

播放時數：ANC 關閉時單次長達 18 小時

防水規格：IPX4