Emoji種類包羅萬有，適當使用可以令對話增添趣味，但我相信各位男士都體會過，有時你用一個認為係中性或正面嘅Emoji，但對方就往負面方向解讀，覺得你係hea/暗串佢，跟手就嬲埋你唔應機。最近美國有位心理學教授就做咗個研究，發現原來女性比男性更容易負面地解讀Emoji意思，各位兄弟睇路啦！

（圖片截自：emojipedia）

據《華爾街日報》報導，美國韋恩州立大學心理學副教授Lara Jones察覺到男性同女性會用唔同方式解讀Emoji，於是決定探討貫中差異，並將研究結果刊登到心理學期刊《Computers in Human Behavior》。該研究總共搵嚟299位17-35歲學生，並向佢哋隨機展示70款時下流行嘅Apple Emoji，再詢問受試者覺得符號係正面定抑或負面。

男士覺得正面，女士覺得負面嘅Emoji。（圖片截自：emojipedia）

研究結果顯示，女性比男性更容易負面解讀所有Emoji，其中一個例子就係「思考表情」，Lara Jones指出男士會覺得呢個表情有啲正面，而女士就覺得有啲負面，「有角笑臉」同「眉毛驚訝樣」都有相同情況。

女士認為更加負面嘅Emoji。（圖片截自：emojipedia）

女士認為更加正面嘅Emoji。（圖片截自：emojipedia）

另外，有幾款Emoji男士覺得有啲負面，女士覺得好負面，分別係「中性表情」、「翻白眼」以及「擔心樣」等等。而「眯眼笑臉」、「笑眼笑臉」、「黑超笑臉」以及「夾住條利笑」就係男士覺得正面，女士覺得更加正面嘅Emoji。實驗當中冇出現女士覺得負面，而男士覺得更加負面嘅Emoji。