對大家黎講，聖誕有啲咩係不可或缺嘅？聖誕大餐？聖誕禮物？定係一如以往見住街裏愛人一對對，而你只能匿喺屋企喊得一句句嘅寂寞？對於北美民眾黎講，其中一樣不可或缺嘅大概就係商場入面嘅聖誕老人。不過據報，由於疫情影響，今年北美出現聖誕老人荒，就算出到一萬美金都冇人肯做。

雖然上年聖誕都有疫情，但由於當時疫情嚴重、各國封城，商場基本上用唔著聖誕老人，自然就冇聖誕老人短缺問題。但隨住疫情初步受控、生活漸漸回復正常，今年北美各大商場都希望用聖誕老人黎吸引人流，需求自然上升。

另一方面，疫情的確造成聖誕老人供應短缺。據美國一間「聖誕老人搵工公司」指，曾經與佢哋合作過嘅近8,000名聖誕老人中，有335名於去年過世，當中「疫情係主要原因」；淨返嘅聖誕老人亦因為怕近距離接觸人群而推Job，甚或乾脆退休。考慮到聖誕老人們都係上咗年紀，而且大多身型肥胖，為健康著想似乎亦無可厚非。

喺需求增加而供應減少嘅情況下，再加上好多商場都因為擔心疫情又再有變而拖到最後一刻先決定請唔請聖誕老人，結果造成聖誕老人人工急升。據報聖誕老人嘅薪酬比過往增長15%，去到一萬美金 (即約HK$78,000)，但依然無辦法搵到足夠嘅聖誕老人。亦有商場轉為只於週末聘請聖誕老人、值班時間亦更短等折衷辦法。

資料來源：Yahoo! Life