大家日常生活中應該會遇上唔少「Too Long Didn't Read (TLDR)」嘅情況，例如近日某男星、某男星前妻同某男星老豆寫嘅千字文，我估絕大部份人都冇成篇睇哂，就算睇哂你都只係為咗捉呀男星寫錯字。又或者銀行啲條款、某啲網站嘅「你是否年滿18歲？」頁面，大家都係睇都唔睇就同意。美國一位教授就測試一下究竟有冇學生會認真睇下佢個課程大綱，所以喺文中藏咗個尋寶訊息。結果成個學期完咗，嗰50蚊都係原封不動。

圖片：Kenyon Wilson on Facebook

來自美國田納西演藝大學嘅音樂教授Kenyon Wilson，因為想測試一下有冇學生會睇下個課程大綱，於是喺學期頭做咗個實驗：佢喺大綱中寫明「先到先得；第147號儲物櫃，密碼15、25、35」，只要學生跟住指示搵到個Locker，再用密碼開鎖，就會發現入面有張50美金同一封教授嘅手寫信。但即使Wilson教授特登提醒71名學生「個大綱有嘢改過架」，由派發大綱到學期完，唔好講話打開個Locker拎到嗰50蚊，Wilson教授發現連個鎖都冇人郁過。

Kenyon Wilson 教授

圖片：Kenyon Wilson on Facebook

據《CNN》訪問一位啱啱畢業、上咗3年半Wilson教授堂嘅學生指，由於課程大綱年年都一樣，所以大家都只係「立眼」望下就算，根本就冇仔細睇，佢亦認為Wilson教授嘅實驗非常有趣，「肯定教識學生們，就算明知係重覆嘅資訊，都應該要認真睇下」。Wilson教授將成件事Post上自己嘅FB後，獲得超過1,400個讚好，佢向《CNN》表示，「或者下個學期將會係最多人睇課程大綱嘅一次」。

資料來源：CNN