改編自英國皇室歷史嘅Netflix劇集《The Crown》，從開播至今一直極具人氣，更喺今年艾美獎及金球獎掃走多個獎項，預計第五季將於出年11月播出，劇情大約講到上世紀90年代所發生嘅事。據英媒Daily Mail報導，日前戲組就喺倫敦西區搭咗個香港景出嚟，似乎打算重現當年香港主權移交過程。

從圖片可以見到，劇組似乎模仿緊1997年6月30日晚上，多名英國官員喺警察護送之下前往會展出席交接儀式，而且圖入面仲有一部88R路線嘅城巴。雖然嚴格嚟講嗰景有好多唔相似嘅地方，例如當時未轉用橙色垃圾桶，但相信戲組已經盡力還原，唔知大家睇完又有咩感覺呢？