要講最多人識嘅賽車動漫，《頭文字D》敢認第二，都真係未必有人敢認第一，畢竟就算未睇過原作，都一定知道AE-86、一定聽過「我要揸GTR」。不過，其實《頭文字D》嘅漫畫早於2013年就已經連載完畢，作者重野秀一 (しげの 秀一)亦於2017年開始連載續作《MF Ghost》，而近日就公佈《MF Ghost》都會於明年動畫化啦！

《MF Ghost》嘅故事發生於「202X年」，即係《頭文字D》嘅二、三十年後，而且帶有近未來設定，指屆時世上所有車廠都停止生產汽油車，改為生產電動車或氫燃料車。同時，有一群熱愛汽油車嘅人就利用日本嘅街道、山路、高速公路舉行「MFG」賽事。而日英混血主角、兼藤原拓海弟子片桐夏向就回到日本參加賽事。

既然故事發生於202X年，咁入面啲車當然冇可能仲係AE86。好似主角片桐夏向揸嘅就係GT-86、勁敵之一相葉瞬就揸Nissan GT-R Nismo，另外仲有Porsche 718 Cayman、Porsche 911 Carrera GT3、Ferrari 488 GTB、Lamborghini Huracan LP610-4、Alpine A110等近代名車。動畫將於2023年播放。