如果我同你講起，近來外國網絡興起一系列「#maleaudience」嘅影片，你可能會直覺地覺得：「男性觀眾喎！一定係咸濕嘢啦！」咁你就錯啦！因為呢系列「#maleaudience」影片，其實係勾起你心底入面更原始嘅慾望——準確啲黎講，就係作為一個小屁孩嘅願望！

冇錯，所謂嘅「#maleaudience」影片，基本上就係一系列「掉嘢」嘅片，掉嘅嘢大致上係石頭、木頭、冰，掉嘅目標就大概係河道、湖面、結冰嘅湖面之類，追求嘅就係製造水花、裂痕又或者沙塵。你問佢呢啲片有咩意義、有咩作用？我可以好有信心咁答你，冇！但偏偏男人就係鍾意睇啲咁無聊嘅嘢——你唔好同我講你細個嗰陣冇試過不停掉嘢落水，你答我有咩好玩？我都唔知！但就係爽！

呢個「#maleaudience」系列影片，其實係由外國TikTok中率先興起，不過Youtube上亦有唔少同類型影片，用黎輕鬆下都OK嘅。