如果想整杯Cocktail嘆吓，但又唔想出門或酒吧冇開（防疫政策），咁應該點算好呢？日前舉行嘅CES 2022，美國電器品牌Black+Decker就展示出一款5合1調酒機，只要放齊相應嘅原料，撳粒掣即可調出多款雞尾酒。

據官方介紹，呢款名為「Black+Decker Bev」嘅調酒機原理類似於大部份咖啡機，除咗裝水嘅容器之外，仲有五個位置分別擺放氈酒、冧酒、伏特加、威士忌以及龍舌蘭，而且用戶無需將酒率先倒入特製容器，只要將機上嘅不銹鋼吸管直接插入標準嘅750ml酒樽即可（慳返唔少功夫），最後放入對應嘅果汁膠囊，選擇完濃度撳個掣就會自動調配出雞尾酒。

至於清洗方面，官方就話Bev能夠通過空氣及水完成自動清潔，整個過程都唔使30秒，無需擔心調配出嚟嘅雞尾酒會帶有前一杯酒嘅餘味，預計今年春天會正式上市，售價為300美元。