虎年就到啦，本港各大商場都開始充滿新年氣氛，新一年大家都想送走衰氣，咁就真係出黎行番個大運，今次就為大家率先送上15間商場嘅新春主題，快啲睇定黎緊去邊度打卡啦！

東港城

由大中華區首位樂高®專業認證大師洪子健（Andy Hung）主理嘅展品「福虎靈動賀新禧」將登陸東港城，展品由超過3萬粒Lego砌成。另外仲有一個高達6米嘅「樂高®虎運當頭摩天輪」及3D造型的可愛老虎坐鎮，非常應節。

黃埔天地

黃埔天地今年首度邀請芬蘭藝術家 Janine Rewell 為商場打造中西合壁嘅《黃埔招財 潮喵過肥年》新年裝飾，於黃埔號及聚寶坊帶來潮萌招財潮貓，融合別樹一幟藝術元素及色調，為各位市民迎福招財！

荃灣千色匯及元朗千色匯

水墨畫作為中國傳統藝術，千色匯就決定將佢帶比市民，新年活動《水墨「型」虎年世一》大玩新舊元素Crossover，認真水墨畫其實都幾有氣勢！

尖沙咀LCX

LCX今年嘅《 LCX x RiCO新春音樂農莊》邀請到韓國人氣插畫家RiCO帶來新成員萌萌金虎，岩晒虎年向市民拜年！新春農莊入面將齊集蘋果、菠蘿、蜜柑、蘑菇、蘿蔔兔等蔬果及小動物，一同舉辦盛大嘅音樂聚會，現場仲有RiCO村許願樹讓大家體驗吉祥氣氛！

時代廣場

虎年邊個話一定只係得老虎架? 時代廣場就有請黎葛民輝聯同姜氏金龍醒獅團，打造「獅威鼓響」新春企劃，現場展出10米長嘅巨型醒獅隧道，展出姜氏金龍醒獅，仲有 1.8米高嘅巨型醒獅鼓手及「醒獅疊羅漢」，隨時勁過老虎呀！

Mira Place

今個農曆新年，Mira Place為市民帶來鼓「喜」福臨主題一齊迎新春，商場中庭會設置主題新春佈置，以喜氣洋洋的鼓聲除舊歲迎新春，與大家一同祈福集氣做善事！只要喺中庭嘅巨型福鼓每撃鼓一百次，Mira Place將會送出一個新春福袋予聖雅各福群會，等你吸納好運嘅同時為有需要人士出一分力，你仲唔去敲埋一份！

如心廣場及翩滙坊, 中環街市

本港年宵花市因疫情取消，一眾本地花農首當其衝，急需尋找年花銷售渠道。如心廣場、翩滙坊及中環街市就特意舉辦期間限定「百花齊放年花市場」，以實際行動支持本地花農，為他們提供一個額外銷售渠道，以免花農的心血全付諸流水。

MCP新都城中心

胖虎? 唔係個個胖虎呀，今次呢隻真係一隻老虎。今次MC邀請《我不是胖虎》首度來港同大家過虎年。商場設有4.5米高嘅超巨型胖虎及6大虎虎生威新春打卡位，同時「我不是胖虎快閃店」亦都首次登陸香港！

MOSTown新港城中心

新港城中心今年新春就為大家帶來日本原創角色《Usagyuuun小突兔》與香港人氣卡通人物《癲噹》進行聯乘合作 - 「新春之最玩轉『籠』鳳茶樓」主題活動，一眾賀年點心百變登場，仲有10大茶樓喜慶場景，加上兩大人氣角色大家慢慢打卡啦！

東薈城名店倉

東薈城名店倉今年就夥拍人氣角色「白爛貓」，帶來「闔虎統請」主題新春場景，一眾角色將以全虎年喜慶造型首度喺香港登場，包括新春別注《橫財就手》貓抓板、《步步高陞》貓爬架及《年年有餘》魚罐頭等，造型可愛!

PopWalk天晉滙

今個農曆新年PopWalk天晉滙誠意打造4組藝．日本景點，佢地找來台灣人氣文青插畫家WHOSMiNG合力炮製「PopWalk X WHOSMiNG旨在一喜」日式主題裝置，讓大家感受到濃厚遊日浪漫！

IFC商場

IFC今年以「鼓舞歡欣」迎新春為主題，設計帶來張燈結綵嘅傳統市集樣式，現場設有高達四米大燈籠加上祥鼓，你將可以於「幸運廊」中細味千載文化。

香港仔中心

虎年新春期間，香港仔中心將為市民帶1來「 光影花燈園 」活動，現場以花燈及花海光影作主題，岩晒新春期間打卡之用，等你好似置身於花花世界之中。廣場中央更設置別緻且色彩繽紛嘅巨型花燈裝置，內裡掛滿發光花燈及多角度鏡子，拍攝效果相當夢幻。

現崇山商場

位於黃大仙嘅現崇山商場，今年新春就以懷舊港式藝術為題，於佳節期間與大家一同回味懷舊情懷，其中商場將與小巴牌制作大師「麥錦生師傅」及人氣沖曬小店「一捲」舉辦連串懷舊 x 藝術主題活動，現場更有期間限定特色小巴站打卡牆、創意小巴牌揮春工作坊及黑白沖曬工作坊等，適合一家大小參與。

上水中心及將軍澳新都城中心一期

於新春期間上水中心及將軍澳新都城中心一期將以繁花綻放、萬花筒世界，再配合花燈裝飾及光影裝置，打造絢麗多彩、喜氣盈盈嘅「新春光影花世界」。你將可以在巨型鏡面嘅萬花筒、繁花祈願隧道及閃爍人緣桃花樹影相打卡，現場充滿新春氣氛。