迪士尼真人版《雪姑七友》未開拍已經爭議不斷，先係拉丁裔女星Rachel Zegler獲選飾演「白雪公主」而被網民批評膚色偏離原著，唔符合「白雪」形象。依家又爆出另一單爭議，今次係有關「七個小矮人」嘅故事設定。

據外媒《The Hollywood Reporter》報導，曾出演《Game of Thrones（權力的遊戲 ）》嘅Peter Dinklage日前出席由Marc Maron主持嘅Podcast節目，期間提到真人版《雪姑七友》嗰時就爆粗批評成個故事都非常落後/不合時宜（backward）：「當佢哋(迪士尼)搵嚟拉丁裔女星出演白雪公主並感到非常自豪嗰陣，我就覺得有啲驚訝，因為佢仍然係講緊《雪姑七友》呢個故事，佢哋不妨退一步，諗下究竟做緊乜嘢。佢喺某一方面進步，但同時又要拍一個落後於時代嘅故仔，講述七個小矮人一齊住喺山洞？What the fxxk are you doing, man？唔通我為呢類事情發聲得唔夠？睇嚟我聲音仲係未夠大。」

對於Peter Dinklage嘅批評，迪士尼隨即發聲明回應：「為避免強化原版動畫嘅刻板印象，我哋將會對7個角色採取截然不同嘅呈現方式，並且會一直咨詢侏儒社區成員。經過漫長嘅開發期後，電影進入製作階段時將會向大家分享更多資訊。」

《雪姑七友》真人版電影確認由《500 Days of Summer（心跳500天）》、《The Amazing Spider-Man（蜘蛛俠：驚世現新）》導演Marc Webb執導，並與《La La Land（星聲夢裡人）》監製Marc Platt共同擔任監製，預計今年開拍。