近年騰訊不斷拓展海外市場，收購多間遊戲公司及工作室，同時亦參與過唔少歐美電影投資。最近《God of War（戰神）》作家兼遊戲記者Alanah Pearce就大爆，騰訊曾要求佢哋投資嘅電影唔可以有黑人角色，而且必須要有大胸部女角。

圖片截自：Facebook@Alanah Pearce

目前喺SIE Santa Monica Studio擔任遊戲作家嘅Alanah Pearce，最近接受Twitch頻道《TheSerfsTV》訪問期間，提到比起微軟以天價收購動視暴雪，佢其實更在意騰訊嘅動向。事關佢有位朋友曾經拍過一部由騰訊投資嘅電影，被對方要求唔可以有黑人演員，並且女角需要有「更大的胸部」，Alanah Pearce就認為呢啲規則或者同樣適用於騰訊所投資嘅遊戲。不過，擔心會被騰訊起訴嘅Alanah Pearce亦即時戴返個頭盔，強調自己只係打聽返嚟，唔確定係咪真有其事。

（圖片截自：Twitch）

眾所周知，近年歐美影視及電玩作品都講求多元化，主角唔再一味由男性擔任，同時加入更多唔同種族、膚色、性取向嘅人物。相比之下，騰訊嘅要求固然顯得非常過時同唔正確，所以喺網上引起唔少討論。

對此，騰訊就透過外媒《TheGamer》回覆，表示Alanah Pearce嘅言論同公司嘅文化及價值觀背道而馳，亦係未經證實嘅遙言，強調會認真對待今次事件。