早於1991年播出嘅賽車動畫《高智能方程式》（新世紀GPXサイバーフォーミュラ），相信係唔少朋友嘅童年回憶，當中嘅金句「今日嘅我...冇極限呢回事呀！」更係家傳戶曉。日前香港模型商threezero就宣布同日本品牌Megahouse合作，聯手推出元祖雷神 Asurada G.S.X 1:18 合金模型。

本作由threezero創意總監Kelvin Sau重新設計，全長24cm、比例為1:18，車身由合金、POM及ABS組成。除咗外觀上精細還原各項細節，車身更配備多個可動機關，車門、車頂、尾翼、車轆、推進器以及油箱蓋都可以打開及微調，而且頭尾燈、儀表板更設有LED燈，能夠透過專用展示台切換各種發光模式。另外，模型亦會附送一個能夠放入駕駛座嘅「風見車人」人偶。

「VARIABLE ACTION Hi-SPEC UNITED《高智能方程式》 Asurada G.S.X 」定價為43,780日圓[含稅]（約$2,960港幣），預計2023年3月發售，暫時未知幾時開放預訂，有興趣嘅朋友請密切留意。

資料來源：threezero、megahobbyexpo