以目前電玩界嘅風氣，一隻Game能夠持續玩到幾個月已經好犀利，玩到幾年嘅可能已經係電競類型遊戲，但偏偏Rockstar Games推出、理論上只係一隻「普通」開放世界遊戲嘅《GTA 5》，就由2013年推出後紅到依家，紅到Rockstar似乎冇興趣推出下一隻。不過Rockstar近日終於確認，下一集《GTA》目前已經開發中，據外媒估計最快2024年就有機會推出。

圖片：截圖自RockstarGames.com

Rockstar上週五於官網發出公告，交待未來嘅發展方向，當中主要係提到PS5及Xbox Series X/S 版本嘅《GTA V》及《GTA Online》以及相關更新。但在公告嘅結尾，佢哋就講到「鑑於《GTA V》前所未見嘅遊戲壽命，我哋知道好多人都問緊《GTA》系列嘅新作發展。我哋每次推出新計劃，都希望可以明顯地超越前作——依家我哋就可以欣然確認，《GTA》系列嘅新作已經處於開發當中。我哋會於準備好後向大家公佈更多詳情，大家請繼續留意官方消息。」

圖片：截圖自RockstarGames.com

冇錯，整個公告其實就只係話畀大家知佢哋關發緊《GTA》系列嘅新作，但新作係唔係眾望所歸嘅《GTA VI》、幾時推出、與前作會有咩唔同等一概都係未公佈。不過據《IGN》報導，早於2020年Rockstar就已經秘密開發緊《GTA》新作，假若消息屬實，即係隻Game已經開發咗一整年，而如果一切順利嘅話，最快於2024或2025年就會見街。

另外Rockstar去年亦為一個新嘅NPC系統申請專利，主要係令系統製作出一個更像真嘅交通環境，以及令路人們嘅行為更像真。有傳該系統會用於《GTA》新作之上。

資料來源：RockstarGames.com