護照除咗係一本身份證明文件，同時亦反映住該國特色，例如有國家會印上著名旅遊勝地、具代表性嘅動物或傳統藝術等等。日前比利時所推出嘅新護照，就印上當地國級寶漫畫《丁丁歷險記（The Adventures of Tintin）》及《藍精靈（The Smurfs）》等經典人物。

綜合外媒報導，比利時喺今日推出嘅新版護照，除咗增加多項防偽技術，內頁更印上丁丁、藍精靈、Lucky Luke等當地家傳戶曉嘅漫畫角色，而且大部份場景都係取材自漫畫原圖，並且有背包、地圖、地球儀圖案等旅行元素。比利時外交部長Sophie Wilmès就表示，新護照能夠代表比利時嘅藝術及文化、同時彰顯幽默嘅一面。

或者講到漫畫，大家可能會諗起日本，目前日本護照採用浮世繪大師葛飾北齋代表作《富嶽三十六景》，著名嘅《神奈川沖浪裏》亦收納其中，充分體現日本傳統文化特色。如果...我只係話如果日本都學比利時轉用漫畫人物，咁應該印咩角色好呢？