日本環球影城每年都會推出與不同動漫合作嘅「Universal Cool Japan」活動及主題設施，而最新公佈嘅「Universal Cool Japan 2022」中除咗有早前就報導過嘅《Monster Hunter World: Iceborne XR Walk》之外，仲會有《名偵探柯南》、《進擊的巨人》、《美少女戰士》及《HUNTER x HUNTER 獵人》。不過比起遊戲設施，啲週邊似乎就更有話題性。

其中《Hunter》主題設施名叫《HUNTER X HUNTER The Real 4D》，以小岡「包剪揼」與「電光火石」基路亞對戰「伸縮自在的愛」希索卡為主題，將以4D展示念能力特效。講真你有去過USJ你都大概估到個遊戲體驗大概係點，但令人估佢唔到嘅就係啲週邊商品，竟然有「水見式水杯」以及「大岡運動毛巾」。

「水見式水杯」當然就係重現原作中雲古要小岡向水杯發出念力，測試其念力種類嘅儀式，實際上就係一個水杯加上一個水溢出造型嘅杯蓋；而大岡運動毛巾就係充分利用大岡嗰住長頭髮，整成一條長毛巾，雖然感覺上太幼應該唔太好用，但個氣勢贏哂！

另外仲有基路亞同小岡吊飾、火紅之眼糖果，以希索卡為主題嘅啤牌、AirPods收納盒及卡片套。

資料來源：USJ