由1997年版《Lolita（一樹梨花壓海棠）》導演Adrian Lyne執導，「蝙蝠俠」Ben Affleck及「邦女郎」Ana de Armas主演嘅情色心理驚悚片《Deep Water》原定於2020年上映，但由於疫情影響而多次延期，延到連佢哋兩個都分埋手都未有得睇。如今，官方終於定檔3月18日登陸串流平台Hulu，並公開首條預告片。

《Deep Water》改編自美國小說家Patricia Highsmith同名作品，講述一對感情出現問題嘅夫妻為咗維持婚姻，兩人達成協議容許妻子Melinda（Ana de Armas飾）在外尋找情人，但後來丈夫Vic（Ben Affleck飾）抑壓唔住心中嘅嫉妒，將Melinda嘅情人逐一殺害。該片被評為R級，即係片中有血腥暴力、驚悚恐怖、裸露性愛等鏡頭。

除此之外，呢部作品同時係兩人昔日定情之作，但可惜未等到套戲上映就分咗手，依家官方選擇喺2月14日公開首條預告，唔知係咪特登嘅呢？另外，今次係Adrian Lyne繼2002年《Unfaithful（不忠誘罪）》後睽違20年重返電影製作，而且又係佢最拿手嘅題材，值得期待。