荷蘭著名畫家梵高（Vincent Van Gogh）生前飽受精神病折磨，甚至自行割下左耳，一生雖短卻充滿傳奇，筆下過千幅畫作深深影響住後世。最近英國倫敦考陶爾德美術館（Courtauld Gallery）就舉辦一場梵高自畫像展覽，但就因為館方出售「耳仔擦膠」而被批評冒犯梵高，並且唔尊重精神病患者。

據外媒《dailymail》報導，位於倫敦嘅Courtauld Gallery於2月3日至5月8日舉辦梵高自畫像畫展「Van Gogh. Self-Portraits」，展出16張梵高精選畫作，帶大家探究呢位大師自畫像嘅演變過程，其中就包括著名作品《Self-Portrait with Bandaged Ear（耳朵包著繃帶的自畫像）》，吸引唔少熱愛藝術嘅朋友參觀。不過，最近有參觀者就發現館內紀念品商店出售「梵高耳仔擦膠」、標榜為「飽受折磨的藝術家」而設嘅梵高向日葵番梘，以及聲稱能針對20種心理狀態提供建議嘅「情緒急救包」。

由於上述商品明顯係拎緊梵高患精神病嚟開玩笑，而且抽水之餘仲拎埋嚟賺錢，館方隨即遭到多位藝術工作者炮轟，其中反觀念主義藝術（Stuckism）先驅Charles Thomson就批評「自殺唔係開玩笑，精神病亦都唔係開玩笑，呢啲商品既膚淺又麻木不仁！」目前館方已將有關商品下架，得返「情緒急救包」有得買。唔知大家又覺得館方嘅「創意」有冇過火呢？

「情緒急救包」