《奇異博士2：失控多元宇宙》（Doctor Strange in the Multiverse of Madness）次回預告片播出後，當中最令影迷興奮莫過於「X教授」Patrick Stewart疑似回歸，雖然佢本人即時否認有份客串，又扮傻表示有人扮佢把聲，但可能深知紙包唔住火，佢日前再接受訪問時就承認有份出演《奇異博士2》！

自從《奇異博士2》次回預告片播出後，唔少影迷單憑個把熟悉嘅聲音同光頭背影就認出「X教授」將會回歸，只不過佢老人家起初受訪時否認有份參演，仲話「你知啦，喺60年前我開始做戲嗰陣，大家就好鍾意扮我把聲，所以唔關我事。」之不過，佢最近接受YouTube頻道「Jake's Takes」訪問時就一改口風，承認自己有份出演。

Patrick Stewart表示預告播出當日佢熄咗電話，直到第二日起身開機先發現收到大量訊息轟炸，隨後公關人員亦向佢解釋發生咗咩事。有趣嘅係，Patrick Stewart表示其實佢都認唔出自己把聲，唔知係拍攝當日感冒定其他原因，總知聽起嚟就唔太一樣，所以佢非常驚訝影迷能夠憑後肩同耳垂就推測出咁多嘢，令佢感到非常高興。