近年興起一股歌手/樂隊傳記電影風潮，搞到樂壇天后麥當娜（Madonna）都決定拍返部嚟記錄自己奮鬥史，而且仲要親自執導及編劇。最近就有消息指電影已進入選角階段，唔知最後邊個最後會被娜姐睇中呢？

左至右：Julia Garner、Florence Pugh、Emma Laird

據外媒《THR》報導，目前選角已經步入最後階段，候選女星分別有《Ozark（黑錢勝地）》Julia Garner、二代「黑寡婦」Florence Pugh 、HBO劇集《Euphoria（高校十八禁）》Alexa Demie、新晉演員Emma Laird、 Odessa Young以及歌手Bebe Rexha及Sky Ferreira。

消息人士表示，由於今次要扮演嘅係樂壇天后麥當娜，所以試鏡過程極為艱辛，候選女星們需要同娜姐嘅排舞師進行長達11個鐘嘅訓練，之後仲要同娜姐本人練舞同唱歌，無論最後邊個跑出，都可能要再特訓幾個月先可以埋位開拍。無他嘅，因為電影由麥當娜親自執導，並聯同《Juno少女孕記》金像編劇Diablo Cody共同撰寫劇本，所以要求高啲都好正常。

電影將由環球影業發行，內容可能會聚焦麥當娜喺80年代初到紐約嘅奮鬥史，亦會包括1990年Blond Ambition世界巡迴演唱會嘅情節，暫時未知幾時開拍。