由於疫情持續，戲院配合政府防疫措施再度關閉，唔少新戲，甚至今年嘅賀歲片亦無法上畫。香港電影金像獎協會今日亦喺FB宣布，原定4月17日舉行嘅「第40屆香港電影金像獎頒獎禮」將延期至6月舉行。金像獎已經順延咗一年，希望今年可以順利舉辦啦！

第39屆香港電影金像獎只有爾冬陛一人公布得獎名單。

受疫情影響，香港電影金像獎喺前年(第39屆)首度改以線上形式舉行，冇紅地毯、冇表演、亦都冇得獎者感言，由頭到尾得主席「爾冬陛」一個人讀完得獎名單，整個過程約莫十分鐘，非常冷清。

而原定上年舉辦嘅「第40屆香港電影金像獎」更係順延到今年合併投票及頒獎，並定檔4月17日舉行實體頒獎禮，奈何第五波疫情爆發， 所有大型活動取消，限聚令收緊至二人，大會今日就喺Facebook正式公布延期消息，同時標註「#我們没有放棄」「#帶口罩齊抗疫」，強調大會並冇打算放棄今次頒獎禮。各位影迷只能祝願頒獎禮最後能以「實體」形式舉行！

另一邊廂，遠在美國嘅奧斯卡金像獎今年就再度以實體形式舉行，並由Regina Hall、Amy Schumer、Wanda Sykes三位喜劇演員共同擔任主持，3月27日正式揭曉得獎名單。